Tiprasa rokni manthai no rina bagwi national bodol yakarkha ang. Tei jerok power ni loob wngwi tipra motha yakarwi national bodol ni bana romkha, borok tini ni salo dopha ni bagwi kok sawi manya. Tei borokni kokthai kwmawi thangkha. Tiprasa rokno joto bwkhak twi no dongsa khwlaina bagwi, tiprasa rokni puito no swbaiwi tongo BJP bodol. Chongmarini swkang kwbangma kok riphano, chongmari laimani yagulo borok ni kok joto no swlaijagwi thango- Tangsalo Tipra motha bodol ni bisitham sal pungsama salno kitingwi songchajak panda o manjagwi abohai no sakha Tipra motha ni Supremo Bubagra Pradyot Kishore Debbarma. Asalni pandao manjakha kebengnai bodol ni ojama Animesh Debbarma, MLAjwk Nandita Reang, MLA Brisheketu Debbarma no khobui tipra motha bodol ni joto MLA tei kuchuk berem ni ojama sng. Sak baithangni jep no supungna bagwi tipra motha bodolno yakarwi thangwi national bodol ni bana romnai rok no kolkha Bubagra Pradyot Kishore Debbarma. Bo teibu sakha, Haste o Laibumao swijakha, haste ni Regional bodol kebengnai bodol ni barja naharwi joto no wana riwi rikha. Triprasa rokni hamkrai ni kok sana bagwi Tripura bidhansabha o khorok chi tham MLA tongo. Tiprasa rokni bagwi choba khwlaina bagwi tini ni salo bidhansabha o MLA tongo. Phiyabha tiprasa rokni thansa no swbaiwi, tei tiprasa rokni kha- kaham no swbaiwi tongo BJP bodol. Chongmarini kwbangma kok riphano chongmarini yagulo joto swlaijagwi thango borok ni kok. Aboni logi Bubagra teibu sakha, Tipra motha bodol 2023 bidhansabha chongmario kebengnai bodol ni barja mankha, phiyabha sak baithang dophani hamkrai ni bagwi salbrom no choba khwlaina nangnai. Tripura o tabok swk jora tiprasa rok justice manyakhu. Aboni logi bangla script bai madhyamik tei kuchuk madhyamik amjokmung rinano twiwi tangsalo sak baithangni kok phirokmung rikha bubagra Pradyot Kishore Debbarma. Bo teibu swrai swrai khe sakha, rwng swrwngnai swrwngnaijwk sngni sakao joor khwlaiwi no oh raida no lagugjakha. Script no twiwi tiprasa rok bai thwngnani chaitokhe phainai salo nangkukmani kok pirokmung rina bagwi Tripura Madhya shiksha Porisad ni president tei Tripura haphangno toyar wngdi hinwi sokoromkha bubagra Pradyot Kishore Debbarma. Asalo bo teibu sakha, Bubagra sak hamya wngwi mano, phiyabha Bubagra phan kwrwi ya. Kebo jadi bubagra no phan kwrwi hinwi wansukhe, abo borok ni bul wansukmung hinwi sakha bo. Tiprasa rokni manthai no kiphilwi rina bagwi swmai tanglaikha tipra motha bodolni joto MLA tei kuchuk berem ni ojama sng.
Anganwary Inspection tei Monitoring App no phiyogwi rikha Tinku Roy
Haste ni anganwary center rok cherai rokni thinangno kaham swnam thani belai no nangkukmani yakumu toniwi tonioh. Anganwary center rok...
