1924 bisi ni 25 december ni salmario Madhyapradesh ni Gwalior-o achaikha Atal Bihari Bajpayee. Aboni yagulo sak baithangni naikolmung bai ah jorao Bharatiya Janata songha songchajakha tei ah bodol no tabok Bharatiya janata party. 1996 bisi o bjp bodol ni wngwi puila hakotor ni montri bokhorok wngkha bo. Tangsalo bini 99 bisi achaima sal. Abono kitingwi no asalo pradesh BJP ni habanogo kaisa panda songchajakha. Asalni pandao manjakha haste ni montri okra Dr.Manik Saha, pradesh BJP ni president Rajib Bhattacharya, Agartala municipal corporation ni mayor Dipak Majumder, no khobui kubuni adongrok. Asalo Atal Bihari Bajpayee ni mangpilio khomriwi borom yapharkha haste ni montri okra no khobui kubuni adongrok. Asalni yakumu no twiwi montri okra sakha, hakotor no kwrak khwlaina bagwi, hakotor ni lukorog no kaham naikolmung rina bagwi salbrom no sak tharwi samung khwlailangkha Bharat hakotor ni kwcham montri bokhorok eba Bharat Ratna Atal Bihari Bajpayee. Bini phunukjak mario himwi no tabok hakotor no naikolwi tongo montri bokhorok Narendra Modi. Tei Atalji ni mario hinwi no bodol ni joto sipai rok no samung khwlaina bagwi koikha montri okra Dr.Manik Saha.
Asalni pandao kok narukna thangwi pradesh BJP ni tangphang Rajib Bhattacharya sakha, tini ni salo hakotor ni lukorog je kwtal bharat no nogwi tongo, ah bharat no Atal Bihari Bajpayee ni yak ramwi no hamkrai ni lamao twlanjakha. Tabok je kaham naikolmungni samung bwtang chengsajagwi tongo, aborok joto no Atal Bihari ni yak ramwi no chengsajakha. Bo kwbangma projects ni bising twi hakotor ni joto lukorog no chubachu khwlailangkha tei bini phunukjakmario no hinwi samung khwlaiwi tongo BJP haphang. Pradesh bjp ni habanogni logi asalo aulini kwbangma bhoth o borom riwi no palaijakha kwcham montri bokhorok Atal Bihari Bajpayee ni achaima sal.
