Kerala ni montri okra Pinarayi Vijayan no kebengwi wanama sinsa koksilsamung tisakha Kerala ni governor Arif Mohammad Khan. Tangsalo SFI ni sipai rok governor ni malkhungno chopropkha hinwi koksilsamung kasakha. Aboni yagulo jolijagwi koksakha governor, Thiruvananthapuram ni lahar o dapot phunugwi tongo gundarok. Khursathai kwlaio, Thiruvananthapuram o Kerala ni governor no kosom bana phunugwi jolilaimung phunuklaikha SFI ni sipai rok. Tangsalo Delhi o thangnani bagwi Thiruvananthapuram ni birkhung kholao thangmani Kerala ni Governor. Ah jorao bini malkhungno gerebwi kosom bana phunuklaikha SFI ni sipai rok. Governor ni Malkhung takhurup sakhurup khwlaimani koksilsamung ksakha. Governor ni convey-o tabok bai khe waitham chopropjakha hinwi saimankha. Paithago kaisa thaio convoy bathakjakmani yagulo bo andoland choliwi no tongo. Aboni swrapsani yagulo patimung thaini kharwi thangkha SFI ni sipai rok. Patimungno twiwi belai no jolijakha Kerala ni Governor. Bo teibu sakha, ang direct no sao, ano botok khwlaina bagwi no borok horkha montri okra. Aah gundarok no lamao phaiwi abohai khwlaio hinwi sakha bo. Montri okra kaisa-swk pandao thangphuru bini convoy o kebo abohai khe habwi mano? phiyabha oh jagao samung sitra tangnai rok convey o chopropmani yagulo bo, samung sitra tangnai rok no kharna bagwi chubachu khwlaiwi tongo police. Bo teibu sakha, ang malkhungni ongkhormani yagulo no joto samung sitra tangnai rok kharwi thangkha hinwi sakha bo. Sak baithang Montri okra dagimung tongkhe police tamo khwlainai? I.N.D.I.A kwthalaimung bodol ni bayap wngmani yagulo bo C.P.I.M ni abohai tamungno nogwi belai no naslejakha congress ni MP Shashi Tharoor. Social media oh bo swikha, Kerala ni Governor ni logi SFI ni gunda rokni tamungno nogwi belai no selengjakha bo. Governor Arif Mohammad Khan sab ni malkhungo hamla. communist haphangni naikolmungo abohai patimung belai lachima sinsa. Khursathai kwlaio, thanai sal kisa ramwi kwbangma issue no twiwi Kerala ni montri okra tei Governor ni bisingo kokbanglaimung tabok kisa kotor wngwi phairwk phairwk. Aroni bisingo no tabok direct Kerala ni montri okra Pinarayi Vijayan, Kerala ni Governor Arif Mohammad Khan no bwtharna naio hinwi kok silsakha sak baithang Kerala ni governor. Kerala ni police ni bwkhak twi saimankha, khorok sini SFI ni sipai rok no romkha. Phiyabha oh koksilsamungno twiwi montri okra ni bwkhak twi mungsa kok phirokmung manyakhu.
Anganwary Inspection tei Monitoring App no phiyogwi rikha Tinku Roy
Haste ni anganwary center rok cherai rokni thinangno kaham swnam thani belai no nangkukmani yakumu toniwi tonioh. Anganwary center rok...
