Chongmarini swkang Mohanpur bwkhaste rwgwi Bangladesh rok hakotor oh habwi tongo. Passport tei Visa no karwi no Bharat oh habwi tongo Bangladesh rok. Khorok sa khorok nwi Social traitors rokni chaitokmung bai no Bangladeshi rok Bharat oh habwi tongo hinwi koksilsakha amchaini lukorog. Kwrak salni phungo Mohanpur hati ganani nog nogo bikkha sanwi tongphuru khorok tham Bangladesh no romkha amchaini lukorog. Sidai thanani police ni thani borok no yapharwi rijakha. Borokni mung wngkha Amim Iqbal, Mohammad Nazar tei Mohammad Paran Pagla. Mohanpur hati ganani arini tar rawi kwrak salni phungo bharat oh haphaikha hinwi gosikha borok. Ari oh BSF sengkrak rok duty riwi tongmani yagulo bo bahai khe Bangladeshi rok bharat habwi mann, aboni bagwi BSF rokni duty khwlaimano twiwi kwbangma sungmung kasawi tongkha. Aboni logi je borokni chubachu bai Bangladesh rok bharat oh haphaikha, borokno siniwi kerongni raida bai kwrak yapri naharna bagwi sanmung tisakha Mohanpur ni lukorog. Tei baisa bwkhak kwrak salni aichugo Mohanpur bwkhaste bai khobjak Bamutia Gucchamura kami ni simi khorok bwrwi Bangladeshi no romkha Bamutia fari ni police rok. Romjaknai rok wngkha Sheikh Balu, Sheikh Shah Alam, Rashida Sheikh tei Shamia Khatun. Khorok nwi bwrwi tei khorok nwi chwla hinwi koktwma oh saimankha. Bangladeshi wngmani yagulo bo bisi kolokma ramwi Kolkata oh tongkha borok. Bamutia Bharat Bangladesh ni ari par wngwi ah haste oh thangna bagwi oh khorok bwrwi Bangladeshi rok Tripura oh phaikha. Borokno chubachu khwlainai eba amchaini Biman Kishore Gupta mungwi khorok sa borokno romkha Bamutia fari ni police. BSF rok ari oh mwrwgwi tongmani yagulo bo bahai khe Bangladeshi rok hakotor oh habwi tong? abono twiwi kwbangma koksilsamung tisakha tongkosong lukorog.
