Salthang Tripura achukthai ni nomination rimani himbotok oh kwbangma sipai rok phaikha. Rajakhor auli oh himbotok khwlaiwi salthang Tripura hangkhor ni achukphang Dr.Vishal Kumar ni thani nomination rikha Biplab Kumar Deb. Rajyasabha ni wngmani logi logi Hariyana ni pravary ni barja bo samulokkha bo. Aboni bagwi no nomination rimani jora oh bini gana oh tongna bagwi swrang salo haste oh phaiwi sokphaikha Hariyana haste ni montri okra Nayab Singh Saini, tei kwcham montri okra Manohar Lal Khattar. Hariyana ni kaham nainai Biplab Kumar Deb ni gana oh bhachana bagwi aroni simi kaisa bodol Tripura oh phaikha hinwi sakha bo. Biplab Deb ni bising twi Tripura tei Hariyana ni halok phainai salo teibu kwrak tei kaham wngnai hinwi kha khwlaikha Hariyana haste ni kwcham montri Manohar Lal Khattar. Tripura haste ni montri okra Dr.Manik Saha ni twidulmung bai Tripura haste ni kainwi achukthai no kwbangma vote manwi kwplai wngnai hinwi kha khwlaikha Hariyana ni montri okra Nayab Singh Saini.Hariyana ni phainai nogorai okra sngno lamsogwi naharkha Biplab Kumar Deb ni bayap eba Bubagra Pradyot Kishore Debbarma. Sak baithangni narukmungo bo sakha, Mahabharat ni simi Tripura tei Hariyana ni bisingo halok tongo, phainai salo bo oh halok tongnai hinwi sakha Bubagra Pradyot Kishore Debbarma. Kwbangma bodolni sipai rokno twiwi swrang salo nomination rikha Biplab Kumar Deb.
