Bharat no sak baithangno joto bwkhak twi no swnamna bagwi rihinkha hakotor ni montri bokhorok Narendra Modi. Tei ayang phasingo no naharwi samung khwlaiwi tongo haste haphang. Tabok haste ni sikla sikli rok no sak baithangno bhachariwi manna bagwi yapri naharkha Tripura swnamkhor tei hamkrai tangbedek. Aboni wngwi no Unakoti hangkhor ni 100 sikla sikli rok no Bhudjhong nagar ni swnamkhor o, swnamkhor no twiwi experience tei kha-thangsarina bagwi Hapania ni international mela khwlaima ganao kaisa nangkukmani panda songchajakha. Asalni pandao nogorai okra wngwi manjakha haste sikla tei thwng tangbedekni montri Tinku Roy, TIDC ni chairman Nabadal Banik, Longtorai gura masala ni tangphang Ratan Debnath no khobui kubuni adongrok. Asalni pandao kok narukna thangwi montri sakha, sebok khwlaimano simi sak baithang bhachawi mano hinya, sak baithangni chikon chikon bania khwlaiwi hakotor tei haste ni bagwi mungsa khwlaimano bo sak baithang bhachawi manmani hino. Aboni logi bo teibu sakha, Rubber sini langmao nangkukmani kaisa manwi, chini haste o 80 thousand matrick ton rubber swnamjagwi tongo, phiyabha chini haste o rubber ni manwi swnamjaknai mungsa swnamkhor kwrwi, aboni bagwi kubuni haste ni sakao depend wngwi tongo. Tabok haste ni sikla sikli rok rubber ni manwi khwnwi swnamnani bania chengsawi, aro haste haphang borok no jeswk mansak chubachu khwlainai. Asalni pandao kok narukna thangwi TIDC ni chairman Nabadal Banik sakha, oh haste ni sikla sikli rok ni bagwi kwbangma projects ni sep sap chengsawi rikha, phiyabha maximum sikla sikli rok no ah projects no twiwi sawi manya. Aboni bagwi swnamkhor no twiwi borok no idea rina bagwi joto hangkhor ni sikla sikli rok no saiwi 100 sikla sikli rok no swnamkhor o twlangjaknai tei haphangni kwbangma projects no twiwi hujak khwlaijaknai hinwi sakha. Haste ni sikla sikli rok no bania no twiwi kha-thangsarina bagwi no asalni pandao sak baithangni
experience no twiwi kok sakha haste ni mung gwnang bania khwlainai Longtorai Gura masala ni tangphang Ratan Debnath.
