Agartala municipal corporation bai khobjak Longkamura 1 no ward ni Bhumihin colony amchaio kata tar tongmani bagwi 100 kani thai Bangladesh ni ario khobjakha. Ah amchaio nungjaknai twini belai no jwngjal nukjakha, Ah thaio hukbar khwlainano karwi ajimungni mungsa lama kwrwi, ah thaio watwi jora simi watwi ni twi bai hukbar khwlaiwi nukhung khawi tongmani borok, kwchangma jora rogo twini bagwi belai no jwngjal nukjagwi tongo aro. Aboni bagwi hukbar khwlainai rok ni kok no wansugwi haste haphang ni Water Resources Department ni luajimung bai 35 lakh rang swbaiwi kaisa twini pump achukriwi rikha aro. Tabok hukbar khwlainai rok oh pump ni twi bai no hukbar khwlaiwi manai. Sangrong salo oh pump mechine no phiyogwi rikha Agartala municipal corporation ni mayor Dipak Majumder, kwcham MLA Dilip Das. Asalni panda paimani yagulo kwcham MLA Dilip Das sakha, oh pump ni bagwi amchaini hukbar khwklainai rok belai no hamari manai. Aboni logi hukbar khwlainai rok no tei kaisa chubachu khwlaikha mayor. Bharat-Bangladesh ni BSF rok bai koklam salaiwi ari ni ayang par-oh thangnani jora khwlaiwi rikha. Aswk sal jora Bangladesh o thangnani bagwi salo waisa no permission rijago, phiyabha tabok borok no wainwi thangnani sep khwlaiwi rikha. Asalo koktwma thumnai rok ni bwskango mayor sakha, haphangni chaitokma bai oh pump achukrijakha, phiyabha haphangni officers abono jora jora o naikolwi mangwlak, amchaini lukorog no oh pump no kaham khe naikolwi ma tongnai hinwi sakha mayor. Pump nosta wngya twi khe naikolna bagwi koikha bo. Asalni panda paimani yagulo ari ni amchai rok no goriwi naikha mayor tei MLA no khobui kubuni adongrok.
Anganwary Inspection tei Monitoring App no phiyogwi rikha Tinku Roy
Haste ni anganwary center rok cherai rokni thinangno kaham swnam thani belai no nangkukmani yakumu toniwi tonioh. Anganwary center rok...
