Haste ni kwbangma hukumu mukumu rwkjak ter eba panda, haste ni joto bosongni lukorog no thansa khwlaiwi tonikha. Tripura no ek tripura shreshtha Tripura swnamnanio belai no chubachu wngwi tongo. Sangrong salo hukumu mukumu bedekni luajimung bai Paradise chowmony o mayer-goman-Carnival ni panda o manjagwi abohai no sakha haste ni montri okra Dr.Manik Saha. O pandao kok narukna thangwi montri okra sakha, hukumu mukumu bedekni luajimung bai thanai bisi ni simi kaisa wansukmungno twiwi no chengsajakha Carnival. O Carnival haste ni lukorog no khatung khaza ni boyer tubuwi riphaikha. Takwlai bisi o hukumu mukumu bedekni luajimung bai belai no naithothok khwlaiwi Carvinal songchajakha. Aboni bagwi haste ni hukumu mukumu bedekni adongrok no hambai yapharkha montri okra. Ah pandao Montri okra teibu sakha, haste o tabok tongkwchang ni boyer bowi tongo. Aboni bagwi takwlai o thanai bisi ni sai kwbang Osa mwtai khwlaijakha. Tongkwchang tei naithothok ni bising twi no takwlaini osa mwtai wngkha. Osa mwtai no kitingwi haste ni lukorog ni bisingo belai no khatung khaza wngmani nukjakha. O pandao montri okra no karwi bo manjakha haste ni rangthong montri Pranajit Singha Roy, thanglaisu bedekni montri Sushanta Chowdhury, swnamkhor tei bania bedekni montri Santana Chakma, hoda hamkrai tei hoda rwng bedekni montri Tinku Roy, Tiprasa hamkrai bedekni montri Bikash Debbarma, minority ni montri Sukla Charan Noatia, Agartala municipal corporation ni mayor Dipak Majumder, chief secretary J.K Singha, Director General of Police Amitabh Ranjan, hukumu mukumu bedekni secretary Pradip Kumar Chakroborty, tei hukumu mukumu bedekni tangphang Bhimbhisar Bhattacharya no khobui kubuni adongrok.
Anganwary Inspection tei Monitoring App no phiyogwi rikha Tinku Roy
Haste ni anganwary center rok cherai rokni thinangno kaham swnam thani belai no nangkukmani yakumu toniwi tonioh. Anganwary center rok...
