Ranirkhamar amchai oh khorok sa bwrwi ni mangkwthwi khachijak mankha. Puila wansukha sak baithangno thwikha hinwi, phiyabha bini mangkwthwi ulta khachijak nogwi wansuklaikha je bono kebo planing khwlaiwi bwtharkha. Koktwma oh sawi mankha, Amtali thana bai khobjak Ranirkhamar amchai oh Krishna Saha ni rubber ranani bagwi thanai bisi tham ramwi tongwi tongo Dholai hangkhor Damchara amchaini Biswajit Debbarma tei bini bihik Sori Debbarma. Aroni bisingo Phasalni horo thwikha Sori Debbarma. Patimungno twiwi bwsai Biswajit sakha, phasalni horo mai chamani yagulo bathroom oh thango Sori Debbarma, phiyabha jora kwdwkma laimani yagulo bo bathroom ni ongkhorliya bihik Sori, aboni bagwi bathroom oh nainani thangkha bwsai Biswajit Debbarma. Phiyabha aro thangwi nogwi mankha, bini bihik yakungo gamsa khajak, tei celling oh ulta khachijak nogwi mankha. Aboni yagulo Sori ni buma bupha sngno koktwma horkha. Phiyabha borokni nog belai hachal wngmani bagwi horo kebo phaiwi manliya. Chasalni phungo bwrwi ni nukhungni borok rok phaiwi sokphaibaikha. Patimungni koktwma manwi aro thangwi sagwikha Amtali thanani OC Ranjit Debnath no khobui police rok. Borokni logi Forensic team no khobui Amtali thanani SDPO Sankar Chandra Das bo thangkha. Thwinai nukhungni borok rok sakha, kebo sak baithang thwinani phano ulta khachijagwi thwiwi manya, sak baithang thwinani hnk khe borokni bokhorok saka oh yakung tola oh se wngu, phiyabha oh case oh totally ulta, yakung saka oh tei bokhorok hnk ba tola oh, abohai khe sak baithang kebo thwiwi manya hinwi koksilsakha bwrwi ni nukhungni borok. Amtali thanani police thwinai bwrui ni bwsai Biswajit Debbarma no ramwi thana oh twlangkha. Bono kaham khwlaiwi sungwi tongo police. Bwrui ni mangkwthwi no Hapania sakham nogo post mortem khwlainani bagwi horjakha. Kaisa mamla khwlaiwi naicherwi tongo police. Police no khobui amchaini lukorog bo bwsai no bwtharo hinwi wansugwi tongo. Phiyabha post-mortem ni report phaimani yagulo no sawi manai. Patimungni yagulo amchai rwgwi belai no wanalaijak.
Anganwary Inspection tei Monitoring App no phiyogwi rikha Tinku Roy
Haste ni anganwary center rok cherai rokni thinangno kaham swnam thani belai no nangkukmani yakumu toniwi tonioh. Anganwary center rok...
