Kwrak naikolmungni bising twi Salka Tripura ni Lok sobha chongmari wngkha. Phasalni phungni simi hor ni dam char jora voters rok line no bhachawi vote riwi tongmani mangpili nugwi mankha. Karbok bidhansabha Mukhchari Village amchaini voters rok rung kawi vote rina phaikha. Sarkar ni raida no rwgwi sarikni dam bwrwi jora vote rinani kok tongmano, phiyabha dam bwrwi ni yagulo bo kwbangma vote center oh voters rokni line ramwi tongmani mangpili nugwi mankha. Salka Tripura oh bebagwi vote rijakha 80.32%. Hakotor ni kubuni haste ni sai joto ni sai kwbangkhuk vote rimani mari nukjakha Tripura haste oh. Phasalni phungni simi no joto vote center oh line ramwi vote rimani mangpili nogwi mankha. Asalo vote rikha haste ni maalmata tangbedekni montri Sudhangshu Das, Santana Chakma, Bikash Debbarma, Animesh Debbarma, Sukla Charan Noatia, Tinku Roy, Tripura bidhansabha ni speaker Biswabandhu Sen, bidhansabha ni hujakphan Kalyani Saha Roy, haste kebengnai bodol ni ojama Jitendra Chowdhury, Salka Tripura oh BJP ni wngwi batainai Kriti Singh Debbarma tei Salka Tripura oh I.N.D.I.A ni bwkhak twi batainai Rajendra Reang. Vote paimani yagulo salthang Tripura ni hangkhor naikolnai ni tangnogo kaisa kokthum panda khwlaiwi sakhwlaikha Chief Electoral Officer Puneet Agarwal. Asalo bo sakha, joto ni chubachu bai no tongkwchang ni bising twi chongmari kaham khe wngkha. Salthang Tripura tei Salka Tripura oh no tongkwchangni bising twi chongmari wngmani bagwi haste ni lukorog no kha kaham yapharkha Chief Electoral Officer Puneet Agarwal.
Anganwary Inspection tei Monitoring App no phiyogwi rikha Tinku Roy
Haste ni anganwary center rok cherai rokni thinangno kaham swnam thani belai no nangkukmani yakumu toniwi tonioh. Anganwary center rok...
