Swrang salni horo congress ni polling agent rokni nog nogo thangwi tala riwi rikha samung sitra tangnai rok. Haste rwgwi loksobha chongmari kaisa habar hamya wngwi tongkha- Vote rimani yagulo koktwma thumnai rokni bwskango phasalo abohai no sakha loksobha chongmari salthang Tripura I.N.D.I.A ni wngwi batainai Asish Kumar Saha. Agartala city ni Maharani Tulsibati Valika school oh vote rikha bo. Vote rimani yagulo bo teibu sakha, vote chengsamani yagulo kwbangma center oh I.N.D.I.A ni polling agent rokno kebengwi tongo. Police ni bwskango habar no tungphwlarinani naiwi tongo BJP ni sipai rok. Pratapghar, Suryamony Nagar, Ramnagar, Banamalipur, Belonia, Sonamura, Udaipur, Dhanpur no khobui haste ni kwbangma center oh bo abohai no patimung wngwi tongo hinwi saimankha. Congress ni bwkhak twi police observer tei election commission no swbai sukurwbwi koksilsawi sakha loksobha chongmari salthang Tripura oh I.N.D.I.A ni wngwi batainai Asish Kumar Saha Phasalo polling agent rokno vote center ni tikhalaiwi horkha hinwi koksilsakha 7-Ramnagar ni by-election oh I.N.D.I.A ni wngwi batainai Ratan Das. Agartala city ni Rampur SB School oh vote rikha bo. Aboni yagulo bo sakha, bhooth ni simi I.N.D.I.A ni polling agent rokno tikhalai horkha. 26 bhooth center oh naimani yagulo sudu kaisa bhooth center oh simi no borokni agent no mankha hinwi sakha bo. Election commission ni raida no swbaiwi bhooth center ni 200 miters ni bisingo no hamya habar khwlaiwi tongo siniya nukya sikla rok. Yaksi tei congress bodolni polling agent rokno karwi phano joto thai oh no kaisa tungphwlalaimani habar wngkha hinwi phasalo koksilsamung khwlaikha 7-Ramnagar bidhansabha kendra oh I.N.D.I.A alliance ni wngwi batainai Ratan Das. Polling agent rokno botok khwlaimani koksilsamung khwlaiwi haste ni Chief Electoral Officer tei salthang Tripura loksobha kendra ni returning officer Dr.Vishal Kumar ni thani kaisa swimung bwlai joma rikha I.N.D.I.A alliance ni kaisa bodol. Asalni swimung bwlai rimani thani samnajakha salthang Tripura oh I.N.D.I.A ni alliance ni wngwi batainai Asish Kumar Saha tei 7-Ramnagar by-election oh batainai Ratan Das, yakchi ojama Pavitra Kar, Manik Dey tei Narayan Kar.
