Tabokni simi Matabari oh reels swnamnani bagwi mana khwlaikha mondir ni tangphang. Sitra tongmung khwlaiwi reels swnamkhe kwrak yapri naharjaknai. Khursathai kwlaio Sati ni 51 pit ni bisingo kaisa pit wngkha Tripura sundari mondir. Tripura eba Bharat hakotor ni kaisa tirthani thai wngkha oh mondir. Aro salbrom brom no kwbangma boktorok ama ni hamari naphaiwi tongbaio. Hakotor rwgwi no sinimung manwi tongo ama ni mondir. Aboni bagwi hakotor ni montri bokhorok ni simi chengsawi kwbangma thwngrwng bodolni ojama rokno khobui bollywood-tollywood ni artist rok bo ama ni hamari nana bagwi phaiwi tongo. Phiyabha kisa sitra samung khwlainai rokni bagwi ama mondir ni habar hamya wngwi kasakha . Oh patimung belai no lachima sinsa phano kobui kok. Thanai sal kisa ramwi social media ni bising twi nogwi mankha Matabari oh mwtai rina phaiwi sitra tomung bai rwchapmung mwsamung ni bising twi reels social media oh post khwlaiwi rikha reels swnamnai rok. Aboni bagwi dharmapran borok rok belai no jolijaklaikha. Oh patimungni koktwma mondir ni thani sagwikhe no, Matabari mondir ni committee rok kaisa kwrak yapri naharkha. Chasalni phungni simi Matabari committee ni bwkhak twi sakhwlaijakha je, mwtai oh phainai je kono borok fano jodi reels swnamkhe, bini bagwi kerongni bwkhak twi kwrak yapri naharjaknai hinwi sakhwlaijakha. Aboni logi kwbangma rangbo jorimana khwlaijagwi mano hinwi saimankha. Asalo koktwma thumnai rokni bwskango abohai no sakha Matabari mondir ni manager Manik Datta. Asalo mwtai rina phaiwi Matabari mondir ni bwkhak twi yapri naharmano twiwi sak baithangni wansukmungno kok sakha BJP Gomati hangkhor ni general scretary Uttam Dey.
