Bisi brom brom ni hai khe no takwlai bisi o bo Maharaja Bir Bikram college ni rwng swrwngnai swrwngnaijwk sngno twiwi fresher panda khwlaijakha. Tangsalo aulini Rabindra Bhavan o kwtal rwng swrwngnai swrwngnaijwk sngno lamsogwi naharmani panda songchajakha. Asalni pandao nogorai okra wngwi manjakha montri okra Dr.Manik Saha, pradesh bjp ni president Rajib Bhattacharya no khobui kubuni adongrok. Asalni pandao kok narukna thangwi montri okra sakha, Haste ni puila degree college wngkha MBB College. Oh college bisi kolokma ramwi Tripura haste ni hukumu mukumu no twiwi choliwi tongo. Aboni logi asalni pandao sak baithangni college ni kok rok no muito manjagwi bini college ni kok rok no sai khwna rikha, tei haste o college wngmani yagulo haste o yaksi bodol ni haphang phaikha, aah jorao college o borok ni dadagiri cholio. Phiyabha tabok haste o bjp haphang phaimani yagulo MBB college ni logi MBB University no chengsajakha tei phatar haste ni university ni sai mungsa jaga twi fano komya MBB university bo hinwi sakha montri okra. O pandao kok narukna thangwi mayor sakha, Oh college ni kwbangma rwng swrwngnai swrwngnaijwk sng hakotor ni kwbangma thaio samung khwlaiwi haste ni mung chwngsasa khwlaiwi tongo. Aboni logi Tripura haste no twi Maharaja Bir Bikram Kishore je emang nukkha, aah emang rok no swkangni haphang mwkthang khwlaiya fano, tabok ni haste haphang Maharaja ni emangno mwkthang khwlaina bagwi chaitogwi tongo. Asalni pandao kwtal rwng swrwngnai swrwngnaijwk sngno kok kwcharna thangwi Rajib Bhattacharya sakha, rwng swrwngmani logi logi college ni laibuma no bo sai manna nangnai hinwi sakha bo. Asalni pandao kwbangma rwng swrwngnai swrwngnaijwk phaiwi manjakmani mangpili nukjakha.
Anganwary Inspection tei Monitoring App no phiyogwi rikha Tinku Roy
Haste ni anganwary center rok cherai rokni thinangno kaham swnam thani belai no nangkukmani yakumu toniwi tonioh. Anganwary center rok...
